पत्रकारांचे सातारा जिल्हा पत्रकार भवनाचे स्वप्न अखेर साकारले
खा. उदयनराजेंनी शब्द पाळला : सातारा पालिका सभेत झाला ठराव

सातारा :
सातारा जिल्ह्यातील पत्रकारांनी गेली अनेक वर्षे पाहिलेले सातारा जिल्हा पत्रकार भवनाचे स्वप्न अखेर साकारले आहे. 6 जानेवारी पत्रकार दिनी सातारा जिल्हा पत्रकार संघाने जिल्हा माहिती कार्यालयात झालेल्या कार्यक्रमात जिल्हा पत्रकार भवनाबाबत निर्णायक पावले उचलल्यानंतर खा. श्री. छ. उदयनराजे भोसले यांनी हाकेला साद दिली आणि सातार्‍यात मध्यवर्ती ठिकाणी असलेल्या गोडोली येथील साई मंदिरानजिक सातारा नगरपालिकेने बांधलेल्या इमारतीला जिल्हा पत्रकार भवन व साहित्य सदन असे नाव देण्याचा ठराव प्रशासकीय सभेत घेतला. सर्व प्रक्रिया पूर्ण करुन कोरोनानंतर धुमधडाक्यात जिल्हा पत्रकार भवन व साहित्य सदनाचे उद्घाटन केले जाणार असल्याची माहिती सातारा जिल्हा पत्रकार संघाचे अध्यक्ष हरीष पाटणे व सातारा पत्रकार संघाचे अध्यक्ष विनोद कुलकर्णी यांनी दिली.
सातारा जिल्ह्यात जिल्हा पत्रकार भवन अस्तित्वात नव्हते. गेली अनेक वर्षे जिल्हा पत्रकार भवन व्हावे यासाठी नुसत्या चर्चा झडत होत्या. प्रत्यक्ष जिल्हा पत्रकार भवन आकाराला येत नव्हते. शहरातील प्रशासकीय जागांची पाहणीही यापूर्वीही अनेकदा पत्रकार भवनासाठी करण्यात आली होती. मात्र तांत्रिक अडचणींमुळे जागाही उपलब्ध झाली नाही. यावर्षीच्या 6 जानेवारीला पत्रकार दिनी जिल्हा माहिती कार्यालयात झालेल्या कार्यक्रमात यासदंर्भात कृतियुक्त पावले टाकण्याचा निर्णय जिल्हा पत्रकार संघाचे अध्यक्ष हरीष पाटणे, सातारा पत्रकार संघाचे अध्यक्ष विनोद कुलकर्णी, जिल्हा पत्रकार संघाचे कार्याध्यक्ष शरद काटकर, सरचिटणीस दिपक प्रभावळकर, परिषदेचे प्रतिनिधी सुजित आंबेकर, प्रसिध्दी प्रमुख दिपक शिंदे, ज्येष्ठ पत्रकार श्रीकांत कात्रे, जीवनधर चव्हाण, गजानन चेणगे, संदीप कुलकर्णी, इलेक्ट्रॉनिक मिडियाचे तुषार तपासे, ओंकार कदम, सोशल मिडियाचे अध्यक्ष सनी शिंदे व समस्त पत्रकारांच्या उपस्थितीत घेण्यात आला. जिल्हा पत्रकार भवनाबाबतच्या निर्णयाचे सर्वाधिकार याच कार्यक्रमात सर्वानुमते हरीष पाटणे आणि विनोद कुलकर्णी यांना देण्यात आले. पाटणे आणि कुलकर्णी यांनी कार्यक्रमानंतर लगेचच सातारा पालिकेचे मुख्याधिकारी अभिजीत बापट यांच्याकडे जिल्हा पत्रकार भवनासाठी इमारतीची मागणी केली. खा. श्री. छ. उदयनराजे भोसले यांनी तातडीने त्यात लक्ष घातले. पत्रकार दिनीच शुभेच्छा देताना ‘मीच तुम्हाला जिल्हा पत्रकार भवन देतो,’ असे त्यांनी सांगून टाकले. यासंदर्भात तातडीने इमारतीचा शोध घेण्याची सुचना त्यांनी नगरसेवक अ‍ॅड. डी. जी. बनकर व उपनगराध्यक्ष मनोज शेंडे यांना दिली.
त्यानुसार सातारा शहरात मध्यवर्ती ठिकाणी संपूर्ण जिल्ह्यातील अकराही तालुक्यातून व जिल्ह्याबाहेरुनही येणार्‍या पत्रकारांसाठी सोयीचे ठिकाण ठरेल अशी गोडोली येथील साई मंदिरालगत असलेली सातारा नगरपालिकेने नुकतीच बांधून ठेवलेली इमारत जिल्हा पत्रकार भवनासाठी सुचवण्यात आली. चार मजली असलेल्या या इमारतीचा काही भाग साहित्य परिषदेलाही देण्यात यावा अशी मागणी साहित्य परिषदेच्या शाहूपुरी शाखेनेही केली. त्यानुसार या इमारतीला ‘जिल्हा पत्रकार भवन’ व ‘साहित्य सदन’ असे नाव देण्याचा ठराव सोमवारी सातारा नगरपालिकेच्या प्रशासकीय सभेत मंजूर करण्यात आला.
मध्यवर्ती ठिकाणी असलेल्या या इमारतीच्या सर्वात वरच्या मजल्यावर पत्रकारांच्या निवासाची व्यवस्था, त्याखालच्या मजल्यावर पत्रकारांचे कार्यक्रम व पत्रकार परिषदा यासाठी हॉल, त्याखालच्या मजल्यावर सुसज्ज ग्रंथालय व तळमजल्यावर साहित्य परिषदेच्या उपक्रमांसाठी हॉल अशी रचना ठरवण्यात आली आहे. खा. श्री. छ. उदयनराजे भोसले यांना ही संकल्पना कमालीची भावली असून त्यांनीही याबाबतच्या प्रक्रिया अपूर्ण असतील तर तातडीने पूर्ण करण्याच्या सुचना दिल्या आहेत.
सध्या कोरोनाचा कालावधी आहे. कोरोनाचा कालावधी संपताच व इमारतीची रंगरंगोटी, सुशोभिकरण, निवास व्यवस्था व अन्य बाबींची पूर्तता करुन लवकरच धुमधडाक्यात सातारा जिल्हा पत्रकार भवन व साहित्य सदन या इमारतीचे उद्घाटन व पत्रकारार्पण केले जाईल, अशी माहिती पाटणे व कुलकर्णी यांनी दिली.

चौकट
जिल्ह्यातील पत्रकारांच्या उपयोगी पडलो याचे मोठे समाधान : खा. श्री. छ. उदयनराजे
सातारा जिल्ह्यातील पत्रकारांनी माझ्यावर जिवापाड प्रेम केले आहे. माझे व त्यांचे जिव्हाळ्याचे नाते आहे. सातारां जिल्हा पत्रकार भवनाचा प्रश्न अनेक वर्षे रेंगाळला होता. मला माहित होतं, पत्रकारांचा अनेकजण फक्त वापर करुन घेतात. पत्रकारांना देण्याची वेळ येते तेव्हा सर्वांची चुप्पी असते. माझे मात्र ओठात एक, पोटात एक असे काही नसते. माझ्या मित्रांनी मला जिल्ह्यातील पत्रकारांसाठी जिल्हा पत्रकार भवन मागितले आणि मी ते तातडीने देवू शकलो यातच फार मोठे समाधान आहे. लवकरच इमारतीतील अपुर्‍या बाबी पूर्ण करुन सुसज्ज असे जिल्हा पत्रकार भवन पत्रकारांच्या ताब्यात देवू, अशी प्रतिक्रिया खा. श्री. छ. उदयनराजे भोसले यांनी व्यक्त केली आहे.

मराठी पत्रकार परिषदेने मला सातारा जिल्हा पत्रकार संघाचे अध्यक्षपद दिले. पत्रकारांची आंदोलने, सामाजिक उपक्रम, गोरगरीब पत्रकारांना मदत असे काम जिल्ह्यातील सहकार्‍यांच्या मदतीने आतापर्यंत आम्ही करत आलो आहोत. या सर्व वाटचालीत जिल्हा पत्रकार भवन नाही याची खंत मनाला सातत्याने बोचत होती. अध्यक्षपदाच्या कारकिर्दीतच सातारा जिल्हा पत्रकार भवन व्हावे हे आपले स्वप्न होते. संघटनेच्या पदाधिकार्‍यांसह सर्व सहकार्‍यांनी टाकलेल्या विश्वासाला खा. श्री. छ. उदयनराजे भोसले यांनी साथ दिली. त्यामुळे जिल्ह्यातील हजारो पत्रकारांचे स्वप्न साकारले जात आहे. माझ्या वैयक्तिक पत्रकारितेच्या संघटनात्मक वाटचालीत जिल्हा पत्रकार भवन ही कायमस्वरुपी नोंद राहिल याचा मला अभिमान आहे.
-हरीष पाटणे अध्यक्ष, सातारा जिल्हा पत्रकार संघ

6 जानेवारीला पत्रकार दिनी सातार्‍यात जिल्हा पत्रकार भवन उभे करुन देण्याची जबाबदारी हरीष पाटणे व माझ्यावर सहकार्‍यांनी टाकली होती. याबाबत आम्ही तातडीने पावले उचलली. खा. श्री. छ. उदयनराजे भोसले, उपनगराध्यक्ष मनोज शेंडे, नगरसेवक अ‍ॅड. डी. जी. बनकर, सातारा पालिकेचे प्रशासक व मुख्याधिकारी अभिजीत बापट यांनी आम्ही त्याच दिवशी दिलेल्या अर्जावर विचार केला. नगरपालिका सभेत ठराव करुन ही इमारत जिल्हा पत्रकार भवन व साहित्य सदन म्हणून पत्रकारिता व साहित्यविषयक उपक्रमांसाठी आम्हाला दिली जात असल्याचा निश्चितपणे आनंद व अभिमान वाटतो. सातारा जिल्हा पत्रकार संघाचे अध्यक्ष हरीष पाटणे यांनी जे स्वप्न पाहिले होते ते पूर्ण करण्यात त्यांचा मित्र म्हणून मला कृतीयुक्त सहभाग नोंदवता आला याचा अभिमान वाटतो.
विनोद कुलकर्णी
अध्यक्ष सातारा पत्रकार संघ
अध्यक्ष, साहित्य परिषद शाखा (शाहूपुरी)

मराठी पत्रकार परिषद अंबाजोगाई च्या वतीने देण्यात येणाऱ्या पुरस्काराची घोषणा, 30 जानेवारीला वितरण

  आष्टीच्या सचीन पवार व परळीच्या प्रवीण फुटके यांना पुरस्कार जाहीर 

अंबाजोगाई (प्रतिनिधी)
   मराठी पत्रकार परिषद, मुंबई शाखा अंबाजोगाई च्या वतीने “दर्पण दिन व मूकनायक दिन” सोहळ्याच्या निमित्याने देण्यात येणाऱ्या “स्व नंदकुमार पांचाळ स्मृती पत्रकारिता पुरस्कार” साठी आष्टी येथील दै पुण्यभूमीचे प्रतिनिधी सचीन पवार यांची निवड करण्यात आली आहे. तर “स्व. मौलाना मुश्ताक हुसेन स्मृती पत्रकारिता पुरस्कारा साठी परळी वैजनाथ येथील दै सकाळचे प्रतिनिधी प्रवीण फुटके यांची निवड करण्यात आली असुन या पुरस्काराचे वितरण 30 जानेवारी रविवार रोजी मान्यवरांच्या उपस्थिती मध्ये संपन्न होणार आहे.
     मराठी पत्रकार परिषद, मुंबई शाखा अंबाजोगाई च्या वतीने व “स्व. नंदकुमार पांचाळ स्मृती पत्रकारिता पुरस्कारा साठी बीड जिल्ह्यातून प्रवेशिका मागवण्यात आल्या होत्या. प्राप्त प्रवेशिकांच्या अवलोकना नंतर परिक्षकांनी दिलेल्या निकाला नुसार या पुरस्कारा साठी आष्टी येथील दै पुण्यभूमीचे प्रतिनिधी सचीन पवार यांची “बोंबला यंदा ग्रेजव्युट पोरांनी घेतली उचल, म्हणे सतरंज्या उचलण्याचा हा परिणाम” या वृत्त्ता साठी निवड करण्यात आली असुन परिषदेच्या वतीने मागवण्यात आलेल्या प्रवेशिका मधूनच “स्व. मौलाना मुश्ताक हुसेन स्मृती पत्रकारिता पुरस्कार देण्यात येणार असल्याचे घोषित करण्यात येत आले आहे. या पुरस्कारा साठी परळी वैजनाथ येथील दै सकाळचे प्रतिनिधी प्रवीण फुटके यांची “पतीच्या निधना नंतर समर्थपणे उद्योग सांभाळणारी दुर्गा” या वृत्त्ता साठी निवड करण्यात आली आहे.

दर्पणकार बाळशास्त्री जांभेकर पत्रकार कक्षाचे उदघाटन

   30 जानेवारी रवीवार रोजी सायंकाळी 5 वाजता संपन्न होणाऱ्या “दर्पण दिन व मूकनायक दिन” सोहळ्या निमित्य आयोजित पत्रकारिता पुरस्कार वितरण सोहळ्याचे औचित्य साधूनच अंबाजोगाई शहरात “मराठी पत्रकार परिषदेच्या पुढाकारातून सुशोभीत करण्यात आलेल्या “दर्पणकार बाळशास्त्री जांभेकर पत्रकार कक्षाचे उदघाटन” ही मान्यवरांच्या उपस्थिती मध्ये संपन्न होत आहे. 
   या कार्यक्रमाच्या अध्यक्ष स्थानी मा एस एम देशमुख सर ( मुख्य विश्वस्त मराठी पत्रकार परिषद ) उदघाटक म्हणुन आ. नमिताताई मुंदडा (केज विधानसभा सदस्य) प्रमुख वक्ते म्हणुन ह. भ. प. शामसुंदर सोन्नर महाराज यांची तर प्रमुख अतिथी म्हणुन राजकिशोर मोदी (माजी नगराध्यक्ष, अंबाजोगाई न प), रमेशराव आडसकर (चेअरमन, आंबासाखर), राजेसाहेब देशमुख (अ भा. काँग्रेस बीड जिल्हाध्यक्ष, अमर हबीब(जेष्ठ पत्रकार), आप्पासाहेब जाधव (शिवसेना बीड जिल्हा प्रमुख), डॉ भास्कर खैरे (अधिष्ठाता स्वा रा ती रुग्णालय व वैद्यकीय महाविद्यालय), पो नि बाळासाहेब पवार (शहर पोलीस स्टेशन), पो. नि. वसुदेव मोरे (ग्रामीण पोलीस स्टेशन), ऍड शरद अण्णा लोमटे (अध्यक्ष वकील संघ व कायदेशीर सल्लागार म प परिषद), यांची उपस्थिती लाभणार असुन या प्रसंगी आपली उपस्थिती लाभणार असुन या कार्यक्रमात शहरातील पुरस्कार प्राप्त पत्रकारांना सन्मानित करण्यात येणार आहे. कोरोना नियमास अधीन राहून कार्यक्रम होणार असल्याने सर्वाना मास्क बंधनकारक आहे अशी माहिती दत्तात्रय अंबेकर (बीड जिल्हा कार्याध्यक्ष म प परिषद), डॉ राजेश इंगोले (वैद्यकीय कक्ष प्रमुख) जेष्ठ पत्रकार राम कुलकर्णी, हनुमंत पोखरकर, एम एम कुलकर्णी, गजानन मुडेगावकर (अंबाजोगाई तालुका अध्यक्ष), नागेश औताडे, (तालुका कार्याध्यक्ष) विरेंद्र गुप्ता (सचिव), सतिश मोरे कार्यक्रम प्रमुख  गोविंद खरटमोल (प्रसिद्धी प्रमुख) यांच्या सह मराठी पत्रकार परिषदेच्या सर्व सन्माननीय सदस्यांनी केले आहे.

आपली मदत पत्रकार योगेशचे प्राण वाचवू शकते

नागपूर जिल्ह्यातील कळमेश्वर येथील पत्रकार आणि मराठी पत्रकार परिषदेचे उपाध्यक्ष योगेश कोरडे हे कॅन्सरशी झुंज देत आहेत.. उपचारासाठी होणारा मोठा खर्च आणि बेताची आर्थिक स्थिती यामुळे योगेशला आर्थिक मदतीची गरज आहे.. पैसे नसल्याने योगेशला उपचार अर्धवट सोडून रूग्णालयातून डिस्चार्ज घ्यावा लागला.. परिषदेने त्यांच्या उपचारासाठी ११००० रूपयांची तसेच व्यक्तीगत मी १००० रूपयांची मदत केली आहे.. अन्य काही मित्रांनी देखील मदत केली आहे.. मात्र ही मदत फारच तुटपुंजी असल्याने सर्वांनी सढळ हस्ते मदत करणे आवश्यक आहे.. .. योगेशकडे अधिस्वीकृती नसल्याने सरकारी योजनेतून त्यांना मदत मिळत नाही.. मुख्यमंत्री सहाय्यता निधीतून ही त्यांना मदत मिळाली नसल्याने योगेशचे कुटुंब हतबल झाले आहे..
तेव्हा आपल्या या मित्राच्या, तरूण पत्रकाराच्या मदतीला धावून जाणे आपले सर्वांचे कर्तव्य आहे.. तेव्हा please ज्यांना शक्य आहे अशांनी योगेशला मदत करावी.. त्यांचा खाते क़मांक तसेच फोन पे साठीचा नंबर खाली दिला आहे..

Yogesh nanaji Korde
Union bank kalmeshwar
A.c.no.669202010003317
IFSC CODE UBIN0566926
Phone pay 9767000200

एस.एम.देशमुख

हेच खरे बाळशास्त्री

दर्पणकार आचार्य बाळशास्त्री जांभेकर यांचं निधन 18 मे 1846 रोजी झालं.. 175 वर्षे उलटली आहेत या घटनेला. .. त्यामुळे बाळशास्त्रींचं मुळ छायाचित्र उपलब्ध असण्याची शक्यता नाही.. गुगलवर त्यांची वेगवेगळी चार छायाचित्रे दिसतात… प्रत्येक छायाचित्रकाराने ती आपल्या कल्पनेतून साकारलेली आहेत.. बाळशास्त्री कसे होते हे तर आपल्यापैकी कोणालाच माहिती नाही. पण गुगलवरून छायाचित्र उचलताना आणि ते वापरताना आपण याचा जराही विचार करीत नाही की जे छायाचित्र आपण उचलले आहे ते बाळशास्त्रीच्या व्यक्तीमत्वाच्या जवळपास तरी जाणारे आहे की नाही..? . गुगलवर फिरणारया चित्राच्या छायाचित्रकारांनी ती साकारताना बाळशास्त्रींच्या व्यक्तीमत्वाच्या अभ्यास केलेला आहे असे दिसत नाही.. कोणी तरी सांगितले आणि चित्र रेखाटले असे या चित्रांचे स्वरूप दिसते .. त्यामुळे बहुतेक चित्रातील बाळशास्त्री साठी ओलांडलेले म्हणजे वयोवृद्ध, थकलेले,कृश, निस्तेज वाटतात.. बाळशास्त्री तसे नव्हते.. वयाच्या अवघ्या 32 व्या वर्षी अल्पशा आजाराने त्यांचे निधन झाले होते.. म्हणजे अत्यंत तरूण वयात ते गेले.. ते नियमित व्यायाम करीत असल्याने त्यांची शरीरयष्टी पिळदार होती.. प्रकांड पंडित असलेल्या बाळशास्त्रींची विद्वतता त्यांच्या चेहरयावर विलसत होती.. तारुण्यसुलभ आत्मविश्वास त्यांच्या चेहरयावर आणि व्यक्तीमत्वात दिसत होता..ते रूबाबदार होते.. प़सिध्द चित्रकार मुकुंद बहुलेकर यांनी वरील सर्व गोष्टींचा अभ्यास करून बाळशास्त्रीचे छायाचित्र रेखाटले.. 2000 साली पुणे येथील बालगंधर्व मध्ये झालेल्या मराठी पत्रकार परिषदेच्या कार्यक़मात या छायाचित्राचे प्रकाशन शिवसेना प़मुख बाळासाहेब ठाकरे यांच्या हस्ते करण्यात आले.. त्यावेळेस बाळासाहेब ठाकरे यांनी हेच खरे बाळशास्त्री” अशा शब्दांत या छायाचित्रावर मान्यतेची मोहर उठविली होती.. शिवाय चित्रकार बहुलेकर यांना मंचावर बोलावून त्यांच्या पाठीवर कौतूकाची थाप मारली.. बाळासाहेब हे विख्यात चित्रकार, व्यंगचित्रकार आणि पत्रकार होते.. त्यांनीच चित्रास मान्यता दिल्याने मराठी पत्रकार परिषदेने हेच छायाचित्र तेव्हापासून वापरायला सुरूवात केली.. महाराष्ट्रातील सर्व जिल्हा आणि तालुका पत्रकार संघ देखील हेच छायाचित्र वापरत आहेत.. महाराष्ट्र सरकार 6 जानेवारीला जाहिरातीमधून बाळशास्त्रींचे बहुलेकर यांनी रेखाटलेले चित्र वापरत आहे.. म्हणजे सरकारने देखील या छायाचित्रास मान्यता दिलेली आहे.. त्यामुळे आता कोणी छायाचित्रावरून वाद उकरून काढू नये..
मराठी पत्रकार परिषदेच्या पाठपुराव्यामुळे बाळशास्त्रींच्या नावाचा थोर व्यक्तींच्या नावाच्या यादीत समावेश करण्यात आला, सिंधुदुर्ग जिल्हा मराठी पत्रकार संघ आणि मराठी पत्रकार परिषदेच्या अथक पाठपुराव्यामुळे सरकारने साडेपाच कोटी रूपये खर्च करून ओरस येथे बाळशास्त्रींचे भव्य स्मारक ऊभारले आहे. ..त्याचे लवकरच लोकार्पण होणार आहे.. मुंबई गोवा महामार्गाला बाळशास्त्री जांभेकर याचं नाव देण्याची मागणी देखील परिषदेने लावून धरल्याने काही आत्मे अस्वस्थ झाले असल्यास नवल नाही.. त्यातून चुकीचे छायाचित्र माथी मारण्याचा प्रयत्न होतो आहे.. तो सर्वथा अनुचित आणि गैर आहे.. महाराष्ट्रातील तमाम पत्रकारांना आमची विनंती आहे की, बाळासाहेब ठाकरे यांनी मान्य केलेलेआणि मुकुंद बहुलेकर यांनी रेखाटलेले सोबतचे छायाचित्र येत्या ६ जानेवारी रोजी दर्पण दिनी वापरावे .. कारण हेच छायाचित्र बाळशास्त्रींच्या व्यक्तीमत्वाजवळ जाणारे छायाचित्र आहे…

एस.एम.देशमुख